熱刺領隊夏利列納話能夠踢歐聯對球隊意義重大,無論次回合情況幾咁惡劣都唔會輕言放棄,而左中場加里夫巴利亦謂熱刺一爆發就不可收拾,今晚會完成「不可能的任務」!
列納巴利永不言敗
夏帥表示:「自一九六二年後,熱刺事隔近半世紀至再次進身歐聯分組賽,球隊上下都覺得無限光榮。歐聯係世界頂級球會賽事,熱刺有得踢肯定全力以赴,就算依家落後四球亦唔會阻礙球隊爭勝決心。」
其實熱刺係本屆歐聯神奇球隊,於外圍賽鬥年青人,首回合一度落後三球,之後追番兩粒,再於次回合大勝四球晉級;分組賽作客國際米蘭,熱刺十人應戰兼落後四球下,憑加里夫巴利省三粒僅敗三比四,呢位威爾斯國腳深信熱刺今戰仲有作為。
另外,熱刺球迷首回合涉嫌種族歧視艾迪巴約,球會於官網警告粉絲唔好再犯,若發現必定追究,而歐洲足協亦已派專員到倫敦,將現場睇實熱刺球迷。不過艾迪巴約以往効力阿仙奴時專剋熱刺,首回合又省兩粒,若然今晚又入波,熱刺fans肯定按唔住把火