歐聯八強能抽中史浩克04,國米上下都認為呢支係靚籤,其中舊將費高更話「藍黑兵團」必勝,晉級四強已經毫無懸念。但國米隊長辛尼迪就冇咁老定,因為佢親身經歷過喺歐戰決賽不敵史浩克。話說一九九七年國米同史浩克爭足協盃冠軍,最後賽前被睇好嘅國米射輸十二碼失落冠軍,辛尼迪叫一眾隊友今次醒醒定定,否則再輸一啲都唔奇。足球彩票 足彩预测
97足協盃決賽敗辱
當時決賽係打兩回合,兩軍各勝一場一比○,國米最終於極刑決戰中落敗。九五年加盟「藍黑兵團」嘅辛尼迪,當時一心諗住可以捧盃,可惜事與願違,辛尼迪憶述話:「於決賽落敗永遠係最痛苦嘅事,雖然事發於十四年前,但我仲好記得當時情景,依家終於有機會報仇。雖然牌面上國米秤先,但冇球隊可以靠運氣打入歐聯八強,所以千祈咪睇小史浩克。」
上圈國米逆轉拜仁晉級,今次再鬥德國球隊,國米上下信心十足,前鋒彭迪夫成為上圈晉級功臣,佢話好想作客德國嗰陣再有波入,絕殺日耳曼球隊!