最低工资法例将喺5月1日实施,唔少雇主都想尽办法减低成本,谂埋啲缩数剥削班打工仔。最近有间星级茶记叫班伙记签新约,有薪假变冇薪假、缩短工时乜招都出齐,务求逃避最低工资,咁鬼缩骨无良,试问班员工仲点会全心全意帮公司搏命吖?
祖云达斯又系咁,最近冇主动提出同队长迪比亚路续约不特止,仲叫门将保方将原先嘅550万欧元年薪减到370万欧元(约4,000万港元),两位老将都系“斑马兵团”台柱,咁唔畀面唔影响士气就假咯!Katie收到风,就快做罗马班主嘅迪班尼迪图准备大展拳脚,仲视保方为率领“雌狼”重拾昔日光辉嘅重要人物,一队话要减人工,一队就咁睇得起自己,保方冇离心就假!
王子托迪狂入波
今晚“雌狼”罗马同祖云达斯喺意甲正面交锋,Katie当然支持有托迪压阵嘅罗马啦!咪以为我净系捧靓仔,查实呢支首都球队嘅近况都不知几好,自从“飞机仔”蒙迪拿上任之后,“雌狼”踢5场联赛足足攞到3胜2和佳绩,“罗马王子”更加系入球停不了,个势咁好当然要支持啦!
反观祖记呢边就颓咯,早前连续4场联赛失分,上仗对住下游嘅布雷西亚都系险胜,况且施素高、迪斯基尔同基亚连尼一班中后场球员都打晒柴,想喺奥林匹高球场偷鸡?咪笑大Katie个口,一于要1.75倍主W。(now633台周一凌晨2:45直播)
睇波行街Guide
呢排纽卡素嘅战绩衰到贴地,相信唔少Fans都好失望,好在会方有好嘢益吓球迷,最近佢哋搞紧大清货,好多外套都低至半价,呢排天气忽冷忽热,订番件Jacket就啱晒嘞!
‧历来意甲主场斗祖记录28胜25和23负。
‧蒙迪拿上任后,罗马喺意甲得3胜2和。
祖记场场有失波
‧踏入2011年只系赢过4场联赛。
‧近5场联赛场场有失波。