经过一周国际赛档期后，唔少强队都叫晒救命，其中马德里体育会嘅乌拉圭孖宝科兰同埋高甸，就因为要兼顾国家队比赛而缺席咗日前嘅练习，加上经过舟车劳顿，相信未能及时回复最佳状态，今晚作客奥沙辛拿，仲要冇埋射手阿古路，受让平半都信唔过。（now632及660台周一凌晨3:00直播）
马体会射手阿古路停赛
今晚一战关乎到来届欧霸杯参赛资格，马体会现时只落后第7位嘅西维尔3分，仲有机会争取来届欧洲赛入场券，可惜首席射手阿古路于上场马德里打吡攞到今季第5张黄牌，要喺今场坐波监，此子包办晒近2场联赛嘅全部3个入波，佢嘅缺阵对马体会嚟讲绝对系个重大打击。
奥沙辛拿虽然排第10位，好似冇乜机会踢欧洲赛，但查实近期连续3场联赛赢波之后，其实都只系落后西维尔7分，仍可为来季欧洲赛资格努力。佢哋近期着晒火，近2场波狂轰7球，更好嘅消息系射手彭迪安尼已于日前复操，今场将可复出攻坚。再睇埋往绩，两军近3次对碰，主场一方皆能净胜对手，奥沙辛拿今仗仲要赢埋气势同人脚，有能力喺主场争取4连胜。足球彩票 足彩预测
