国际赛期对于外围庄家嚟讲,唔系一个好赛期,因为投注额明显少咗好多,一般恒常联赛场次冇咗几十场,自然少咗好多投注,再加上好多赛事根本唔知佢乜头乜路,投注者捉路难,更加唔会乱石投林,即使好鬼钟意足球博彩,一样会缩注。
举个简单例子,上周中国队用“国字号”字头分两线出战,一队主场对新西兰,一队作客哥斯达黎加,终于两场和晒,主场输盘,作客赢盘。嗱,今晚中国又踢热身赛,主场对洪都拉斯,球迷真系唔知应该点拣。
A定B队玩谢庄家
其实唔单止赌仔难拣,庄家都难开盘,今日大量国际赛,外围庄家又好,欧洲大型博彩公司如bwin也好,差唔多都开足晒早餐盘,就系开剩中国对洪都拉斯呢场唔知点搞,因为讯息唔流通嘅关系,好多庄家都唔知,究竟呢队中国系“一队”定系“二队”,定系一、二队混合体,所以大部分庄家都谂住等到最后一刻,掌握多啲资讯先开盘。
不过渡边年收到风,呢队会系对新西兰嘅原班人马,远征哥斯达黎加嗰班应该唔会加入,不过主教练高洪波就会回归督师,相信班球员会出力好多,今场大家可以即管小试主W。(周二晚7时35分开赛)