欧洲国家杯外围赛战火重燃，卫冕嘅西班牙会喺格拉纳达恭候捷克，合演I组榜首战。“斗牛兵团”一对箭头费兰度托利斯同韦拿合作无间，“王子”要靠入波挽回信心，韦拿就要争做“士哥王”，睇怕今非昔比嘅捷克都系难逃大败，捧1.62倍“让球主胜”。（now632台周六清晨5:00直播）
自从勇夺南非世界杯之后，西班牙先后喺友赛大败畀阿根廷同葡萄牙，走势明显跌Watt，之不过“斗牛兵团”喺欧国杯外围赛嘅演出尚算稳定，小组3战全胜之余足足轰入10球，即使今仗有队长佩奥尔、法比加斯同柏度洛迪古斯因伤落选，要砌低捷克依然绰绰有余。
韦拿有机会超越鲁尔
仲未为新东家车路士开斋嘅费托，自9月对列支敦士登嘅外围赛梅开二度之后一直食白果，“王子”赛前喺记者会表示，希望藉今战揾番入球触觉，至于佢嘅前线拍档韦拿只要入多粒，就会超越前辈鲁尔荣升西班牙史上No.1“士哥王”，一对箭头都恨入波恨到发烧，捷克防线呢铺实有排忙。
捷克防线甩漏多
以6分位列I组次席嘅捷克，最近喺国际赛以2:4输畀克罗地亚，一条甩甩漏漏嘅防线完全畀唔到人信心，要抵挡西班牙嘅狂轰猛炸真系唔容易。况且防线上最具经验已经要数到侯舒文，中场主将路斯基近年伤多过踢明显回晒塘，前线新星尼斯特同高萨克亦始终较嫩，造访默契同实力兼备嘅西班牙凶多吉少！
西班牙对赛旺开细
‧近2次遇捷克都开入球细。
‧分组赛3战全胜轰入10球。
捷克半场少领先
‧近5场国际赛有4场开细。
‧对上8仗只有1次半场领先。
