I組方面有場捷克主場出戰西班牙。「世界一哥」西班牙在今屆外圍賽6戰全勝已穩獲出線資格，今場心態肯定有所鬆懈，作客仲要讓波，實在信唔過！再者捷克近10場主場只係輸過1次，受讓可捧場。（有線61及201台周六凌晨2時45分直播）
衞冕歐國盃嘅西班牙在今屆外圍賽保持強勢，頭6場贏晒已經取得決賽周入場券，所以餘下兩仗佢哋嘅作戰心態好值得懷疑。事實上，西班牙自從贏得兩項大賽冠軍後，對住一啲無關痛癢嘅賽事，好多時都因hea踢而失準，就好似上年先後畀阿根廷及葡萄牙大炒，都係因為戰意唔夠對手堅決而遭大敗。
小白法比仔齊缺陣
軍情方面，西班牙有「小白」恩尼斯達及法比加斯兩大巴塞主力因傷缺陣，但老將佩奧爾就傷愈可復出。因此加輝認為呢場係捷克搶分嘅黃金機會，鬥心較佳唔怕對手名氣，受讓值得支持。
