由於巴西係2014年世界盃主辦國，唔需要踢外圍賽，未來日子都要搵對手踢熱身賽，作為操練及試陣，「森巴兵團」明早就會作客哥斯達黎加。巴西內部競爭激烈，各位球員都希望三年後入選國家隊喺祖國踢世界盃，所以踢熱身賽都會搏盡，博取領隊文奴文尼斯歡心，炒得起對手，捧「讓球客勝」。（周六早上10時開賽）
巴西兩位前鋒柏圖及羅賓奴因傷落選，成為其他進攻球員爭取上位良機，包括兩位波圖前鋒侯克及基巴拉奧比，兩人只屬國家隊邊緣人物，難得入選，自然會使出渾身解數爭取入波。另一位極想佔國家隊位置係朗拿甸奴，「細哨」近期獲重召，已講明要以表現打動文奴文尼斯，帶佢踢決賽周，「細哨」近幾場熱身賽亦有料到，大大改善中前場串聯工作，加上當弗嘅尼馬，要摧毀哥斯達黎加防線並唔難。
哥斯達黎加近6對賽全敗
哥斯達黎加大多數國腳喺本土搵食，最威球員係被阿仙奴收購嘅前鋒祖爾甘保，但佢只有十九歲，暫時難成氣候。另外，哥軍近六次同巴西交手，全敗收場，其中五場淨輸兩球或以上，「讓球客勝」有2.1倍抵玩。
