意大利盃決賽國際米蘭對巴勒莫，雙方於羅馬奧林匹高球場一場定勝負，若法定時間打和則須加時，加時再和就要互射12碼。近年國米可謂意大利盃決賽常客，曾於05、06及10年捧盃，07及08年則得亞軍，而巴勒莫曾於74及79年打入決賽，奈何兩次都只得亞軍，論決賽經驗國米贏巴勒莫成條街，加上今季仲未有盃落袋，對於意盃這安慰獎更是志在必得，國米即使讓半一，上盤仍然值捧。（周一凌晨3時開賽）
國際米蘭除咗經驗豐富之外，鬥志亦唔懷疑，皆因老闆莫拉堤一向有捧盃癮，李安納度今季在歐聯同意甲都衞冕失敗，如果今晚不能捧走意盃，李安納度實在好難交代，甚至帥位亦難保住。
論往績國米亦佔優，雙方近6次對賽國際米蘭取得4勝2和，更要留意係前鋒柏仙尼季尾頻有「士哥」，賽前佢話一班隊友捧盃無數，但佢自己職業生涯中就連一面冠軍獎牌都未有，故希望今仗可「開齋」。
巴勒莫穩奪歐霸入場券
好多中游球隊都希望透過盃賽以獲取來季歐霸盃參賽資格，巴勒莫亦唔例外。而咁啱國米已取得歐聯資格，歐霸盃席位已直接送到巴勒莫手上。巴勒莫某程度上已經達標，故未必會太在意勝負，今仗捧國米上盤好正路。
