意大利盃16強今晚繼續嚟,拿玻里喺主場對切塞納,值得追1.72倍入球大,因為拿玻里教頭馬沙利同王牌咸錫已分別開口話願意留隊,士氣肯定大振,何況佢哋新簽嘅南球盃神射手伊度亞度華加斯登場,肯定交足貨,證身價開入球騷氹球迷好正常。(開賽時間:周五凌晨4:00)
切塞納不設防
上季拿玻里成為意甲季軍,今季又躋身歐聯16強,唔少球隊吼實佢哋嘅教頭馬沙利,不過佢強調暫時無意離隊,打算留隊至2013年約滿。作為轉會市場搶手貨嘅咸錫,就自爆續約談判接近完成,既然拿玻里歇冬後聯賽首戰能夠以3:1打沉巴勒莫,相信呢場唔會Hea踢。
仲有,上年為智利大學贏到南球盃冠軍,兼且以11球成為神射手嘅伊度亞度華加斯,據講有機會喺今場亮相,轉會後首次為拿玻里上陣,就算射手拿維斯未好番都唔憂冇波入。對家方面,切塞納嘅傷兵問題未解決,而且連續2仗失4球,防線渣到咁,好易開入球大。
意盃賽制:
今輪為16強,均以一場過決勝。若法定時間打和將加時30分鐘,再和則互射12碼