法比加斯望於巴塞做三冠王！西班牙球星法比加斯阿仙奴生涯食白果，重返母會巴塞隆拿後頻頻捧盃，呢位星級中場並未滿足，明言2012年要協助巴塞成為三冠王，連西班牙盃都唔會放過！
最想贏歐聯
法比加斯於「兵工廠」未立寸功，返到巴塞恨捧盃恨到發燒，雖然佢已經先後取得歐洲超級盃及世冠盃等殊榮，但仍極具鬥心，近日喺Twitter表明新年願望：「2012年我想喺巴塞贏更多冠軍，期望做埋三冠王，如果有得揀，我最想贏歐聯！」
法比加斯回巢後表現突出，巴塞中場指揮官沙維話法比仔令佢「升呢」：「我同佢合作好開心，大家互相補位，令我水平進一步提升。」
