球彩台今日連播兩場澳職,尾場7點開波嗰場仲係「兄弟鬩牆」嘅好戲!講嘅係珀斯光輝主場迎戰FC悉尼—基斯哥尼(右圖右)同謝美哥尼兩兄弟首次正面交鋒。賽前基斯哥尼爆料,話珀斯光輝經歷2連敗後會重整防守策略,力求主場重響勝鼓,而且FC悉尼今場又有王牌艾馬頓缺陣信唔過,小弟撐2.1倍主勝。(有線64及204周六晚7:00直播)
FC悉尼艾馬頓踢太公波
基斯哥尼同謝美哥尼原本喺2009/10球季一齊踢珀斯光輝,不過細佬謝美哥尼上季被掟走去咗FC悉尼,先至有今場同室操戈嘅焦點場面出現。
珀斯光輝開季3連勝,點知近2場作客接連輸波,防守明顯出現問題。基斯哥尼透露,球隊近日已經研究緊點改善防守體系,依家會踢最拿手嘅突擊戰術,以佢哋中前場有史美斯同查維斯杜特等球星壓陣,主場出擊必有唔錯發揮。
作客嘅FC悉尼情況啱啱相反,開季脫腳之後近況回勇,上輪更以3:2力克黃金海岸聯。不過喺嗰場踢出加盟後代表作嘅艾馬頓,因為要幫澳洲應付世盃外圍賽今場踢唔到,球隊惟有急Call只得17歲嘅安東尼斯歸隊頂檔。咁搞法,睇怕FC悉尼今場想喺珀斯光輝身上搶分都唔係咁易!