歐聯D組皇家馬德里作客克羅地亞薩格勒布戴拿模，皇馬教練莫連奴今場停賽，但「銀河艦隊」經過莫帥改造後，早已打出團隊精神，即使佢唔可以親自指揮，一班球星亦識自動波踢出部署，要淨贏薩軍兩球或以上仍然綽綽有餘，捧「讓球客勝」。（有線62及202台周四凌晨2時45分直播）
莫連奴上屆四強首回合對巴塞後，出言指責歐洲足協偏幫，結果被罰停賽五場，之後獲減刑，第四及第五場獲緩刑，基於上屆四強次回合已坐咗一場波監，換言之，莫帥可於第三場分組賽復出。無可否認莫連奴對於皇馬非常重要，但今場對手只係相隔十二年重返歐聯分組賽嘅薩格勒布戴拿模，唔需要莫帥出馬，一樣搞得掂。
莫連奴停賽 球星自動波
薩軍對皇馬既畏且敬，會方更特別安排一個VIP包廂畀莫連奴睇波。年僅四十一歲嘅教練祖域斯話一直視莫連奴為偶像，希望可以喺佢身上學嘢，成個「小粉絲」咁，可見佢唔望敢奢望爆冷，薩軍今場輸少當贏。
今場另一焦點係皇馬將自一九七三年來，首度穿上紅色作客球衣比賽。翻查歷史，皇馬之前曾三次喺歐洲賽着紅衫，結果只得二和一負，而且入唔到波，睇嚟今仗係時候打破宿命。
