巴塞隆拿捧盃，兩天才有悲有喜！巴塞尋日擊敗拜仁捧走奧迪盃，梅開二度嘅中場堤亞高艾簡達拿榮膺MVP，被傳媒吹捧成「新細哨」，可憐另一新星約拿芬卡沙斯重創韌帶，要升上一隊幾近絕望！
巴塞中場新星堤亞高艾簡達拿喺尋日決賽再獲派正選上陣，結果佢上、下半場各入1球，協助球隊以2:0擊敗拜仁捧盃。呢位20歲西班牙中場賽後更獲選為最佳球員兼神射手，更有傳媒稱佢為「新沙維」，甚至係「新朗拿甸奴」，風頭一時無兩！
有人歡喜有人愁，上季西乙神射手、巴塞B隊前鋒約拿芬卡沙斯昨仗同樣正選上陣，但就喺下半場因傷離場，其後證實右膝十字韌帶受傷，估計要抖兩個月，對其前途構成嚴重打擊。
AC射12碼4輪全失
季軍戰方面，AC米蘭同國際體育會法定時間踢成2:2要射12碼決勝負，點知AC忽然好似巴西隊上身，頭4輪全部射失，結果輸0:2完場，喺今屆奧迪盃包艇。
