南美洲:
阿根廷、巴西喺剛結束嘅美洲國家盃狼狽出局,身為世青盃奪標次數最多國家(阿根廷6次、巴西4次),兩班小國腳面對嘅壓力認真不小。阿根廷近10年3度捧盃先後靠沙維奧拿、美斯及阿古路食胡,今屆如果要揀一位球員孭飛,相信非18歲小將伊度比莫屬。伊度比身材、踢法都跟美斯同出一轍,早被傳媒封為「新美斯」,佢喺今年一月已被波圖收歸旗下,嚟緊新球季便會正式轉戰歐洲球壇。
菲臘比古天奴做森巴10號
至於巴西最神聖嘅10號球衣會由國際米蘭嘅菲臘比古天奴穿上,佢喺上季意甲及歐聯演出討好,被譽為近年最有創造力嘅巴西年輕中場。南美洲除了以上兩大奪標熱門,東道主哥倫比亞實力亦不容忽視,隨時可為球迷帶來驚喜。