雖然好多人都認為今場只係一場例行公事，不過老撾球迷卻深信有奇迹出現！原來老撾過去7年於主場踢A級國際賽從未輸過，而且今場有二萬名主場球迷支持，一向出名心理質素差嘅國足想踢場好波都唔容易。
由於今場波飛只賣人民幣8蚊，所以主場二萬張門票一早售罄。記得上一圈外圍賽，老撾就係喺全場爆滿情況下反勝柬埔寨晉級。大家唔好睇小呢個主場氣勢，原來老撾對上一次於主場輸波，已經係04年以0比6不敵印尼，主因係佢哋好少喺主場比賽，而且對手多屬魚腩，例如中華台北、柬埔寨。
國足世界排名升兩級
另外，國際足協昨日公布最新世界排名，國足微升兩級至73位，喺亞洲區排名第五。換句話說，如果國足能夠淘汰老撾晉級，於本周六舉行嘅世界盃外圍賽抽籤，國足將被列為第五種子，得以避開日本、澳洲、南韓及伊朗四大強國。
