聯賽頭痕，亞冠醒神，就係水原藍翼今季表現嘅寫照。所以今日水原响亞冠盃16強主場迎戰名古屋鯨魚，不妨睇高東道主半線，博吓個1.9倍主W。（開賽時間：周三晚6:30）
查實呢兩隊今季踢聯賽都唔多掂，水原响韓職本來畀人期望係同全北、浦項爭霸嘅勁旅，點知一分心亞冠盃即刻出事，聯賽排到去第10位，近5場聯賽仲得1和4負。但係佢哋响亞冠盃就非常成功，以不敗姿態喺H組首名出線，由此可見，呢隊波好明顯喺度揀波踢，其實咁亦好難怪，事關佢哋條大水喉三星，同樣係亞冠盃嘅主贊助商，早就恨捧呢個盃向老細邀吓功。
鯨魚個情況都有啲類似水原，佢哋喺日職6戰贏得1場，認真慘情。不過，鯨魚喺亞冠F組以次名晉級16強，表現算做唔錯，但係第二名出線要响16強作客，可能就係佢哋嘅致命傷嘞，因為喺今屆亞冠盃分組賽3場作客波輸咗兩場，擺明作親客就唔識踢。
名古屋鯨魚作客致命
雖然鯨魚個官網近排狂谷呢場大戰，既組織啲兩日一夜嘅應援團，呼籲啲擁躉隨軍助威對抗水原，仲猛介紹响韓國點樣去球場同買飛，連地圖都登埋，鼓勵班球迷搞自由行打氣，但係始終喺人哋地頭，Fans數目輸硬，又幫到乜嘢手吖，都係博水原主W啦！
亞冠盃16強賽制
16強以1場決勝負，分組首名球隊有主場之利，此階段不計算作客入球優惠，若兩隊於90分鐘打和，需要加時分勝負，加時要踢足30分鐘，再和則互射12碼決勝負。
