今晚多场英超关键战拣边场睇?球彩台直播狼队主场对布力般流浪,呢场边队赢就肯定护级成功,如果打和有可能揽住一齐降班,咁计法梗系呢场最刺激啦,我就睇好狼队会好狼死咁踢布力般落去英冠!
相信大部分球迷都对主队较有好感,皆因狼队今季都踢咗好多场好波畀大家睇,佢哋老板赛前向领队麦卡菲大打强心针,话就算不幸降班都唔会炒佢,真有人情味!佢哋近三场联赛抢咗七分,状态唔错,上场作客三比一赢新特兰,中场马菲查维斯一入替即刻有料到,佢最劲系两边出波,入场几分钟即有球靓波畀到首席神射手史提芬费查顶入,希望麦卡菲可以畀佢踢正选啦!
左中场有史堤夫亨特,呢位爱尔兰国脚又系好爆得,有条咁攻得嘅中场线,史提芬费查今晚实有波入。同埋大家都知狼队攻起嚟好睇,但防守就如豆腐,所以必定会以攻代守出尽力抢分,虽然前锋奇云杜里有伤未能上阵,但其余人脚够撑。
布军作客失球冠英超
布力般当然都会同狼队嚟个最后痛击,因为和波大家都冇着数,首循环布力般主场赢三比○,但作客信唔过,十八场联赛作客失四十一球,系英超作客失波最多球队。若果布仔呢场心急抢攻,后防就更易畀狼队揾到机会!
布力般上场打和曼联,皆因对手未尽全力,表现根本唔合格,呢场对狼队就冇咁好彩。布力般今季都令大家睇咗好多场闷波,又令大家输咗唔少钱,一于落去下面英冠玩啦!