拜仁慕尼黑近排終於炒咗「庸帥」尹戈爾，據講看守教練祖卡一上任已獲大批球員支持，士氣返晒嚟，相信今晚德甲可以喺主場砌低利華古遜，畢竟利華教練軒基斯下季就教拜仁，冇理由依家先走嚟同未來老細作對，1.78倍主W值得熱捧！（有線61及64周日晚9:30直播）
上場作客被紐倫堡逼和後，拜仁決定提早炒咗教練尹戈爾，暫由助教祖卡睇住檔先。現年48歲嘅祖卡一向係尹戈爾得力助手，曾出任巴塞同拜仁助教，見慣大場面，加上佢唔同師傅尹戈爾主張鐵腕政策，鍾意同球員溝通，一上任前鋒馬里奧高美斯就大讚佢係「非常正面嘅人」；近期失去正選嘅泰摩斯卓克，更大爆獲祖卡委以重任，今晚可以重新擔任最擅長嘅防守中場。
利華教頭或畀面新老細
雖然拜仁上場失分後已跌落第4，但祖卡賽前揚言有信心喺餘下5場殺返入前3名，取得下屆歐聯入場券。陣容方面，拜仁今場有翼鋒洛賓同中堅畢斯杜巴停賽，又傳列貝利同舒韋恩史迪加有傷，但相信都係煙幕居多，學隊長拿姆話齋，拜仁殺入下屆歐聯唔單止為面子同「錢途」，你話呢場3分點失得？
利華古遜目前落後榜首多蒙特5分，仍有爭標機會，教練軒基斯就預言今場可以贏拜仁2:1，不過呢位教練已肯定下季教拜仁，如果今場贏咗未來老細，一來會成為球迷公敵，二來可能令拜仁冇得參加下屆歐聯，到時教拜仁可能轉打歐霸盃，點睇都弊多於利，再加上利華自89年後作客就未贏過拜仁，今晚想破宿命絕對唔係咁易！
拜仁德甲入波王
‧目前德甲火力王，已轟入61球，平均每場入2.1球。
‧近10場聯賽主場獲9勝1負，勝率高達90%。
利華古遜旺開細
‧史上德甲作客只贏過拜仁2次，對上一次喺1989年。
‧近8場獲5勝1和2負，對上5場有4場開細。
