曼聯王牌射手朗尼缺席操練，今晚關鍵一戰上陣成疑！曼聯尋日係歐聯前最後一課，但朗尼同中堅莊尼伊雲斯都冇喺卡靈頓訓練場出現，費格遜話朗尼有微傷，出唔出得仲存在變數。
另外，朗尼近仗被領隊費格遜安排踢中場中。佢早前接受訪問時，話只要球隊繼續贏，就算冇波入都冇問題，講笑話除咗右閘之外，踢咩位都冇所謂。
曼聯早前大敗予曼城，領隊費格遜明顯對中後場球員唔滿意，覺得中場少咗個領袖壓陣，故要朗尼墮後領軍。朗尼近兩個月，一個聯賽入球都冇，但佢冇擺喺心：「我鍾意踢中場，事實上只要有得落場就得，踢咩位都可以。但最好唔係右閘啦，我覺得踢中前場，能對球賽有更大貢獻。事實上，只要球隊繼續贏落去，我唔介意一直冇波入。」
