新季澳職首輪賽事最強戲碼，必數墨爾本勝利主場對FC悉尼嘅「國家打吡」，淨係睇「基維爾 Vs 艾馬頓」呢個match up已經值回票價啦！主場出擊嘅勝利本來應該秤先，衰在原來佢哋近年揭幕戰戰績極曳，今場捧「讓球客勝」似乎比較划算（有線64及204周六下午3:30直播）
國家打吡號召力強
基於係澳洲最大兩個城市，經常畀人攞嚟做比較，墨爾本同悉尼好早已經係世仇，喺足球場上亦唔例外，次次交手都被喻為當地盛事，好多時仲坐爆。由於近年成績都低落，兩隊今季都大事增兵，當中勝利簽入澳洲史上最成功球星基維爾，至於悉尼就羅致打滾英超多年嘅艾馬頓，旗鼓相當。本來有指兩人因會被國家隊徵召踢世界盃可能齊齊缺陣，唔知好事定壞事嘞，最終澳洲都冇選佢兩個入伍，令兩隻「袋鼠」有機會喺澳職上演世紀碰頭。
基於有地利，勝利本來應該被睇高一線，不過翻查數據，勝利近年極之慢熱，自07-08年球季開始，連續4季澳職首場揭幕戰非和則負，加上雙方近9次交手，悉尼獲2勝5和2負，打成均勢，今場受讓絕對抵捧！
