新一季澳職今日殺到埋身，打頭陣由紐卡素噴射機主場對墨爾本雄心。兩隊今季都被視為季後賽熱門，但噴射機目前傷兵滿營，加上近年揭幕戰勝率極低，對住雄心唔似有運行，「讓球客勝」要捧！（有線64及204周六下午1:30直播）
噴射機居連拿父子bye bye
上季排第7、僅僅同季後賽擦身而過嘅紐卡素噴射機，今季大改革，當中最矚目首推簽入現役澳洲國腳中場居連拿，點知呢位傳聞同噴射機簽3年、身價約值265萬美元（約2,067萬港元）嘅球星早排因膝部重創，仲未開咧就宣布提早收咧，累到佢老竇白蘭高居連拿個教練位都冇埋。而且前鋒布洛奇又因拉傷大腿好大機會缺陣，搞到今場搶分本錢大大減少。事實上睇番數據，噴射機喺揭幕戰戰績極曳，由05-06年球季開始，6場澳職首場賽事只得1勝4勝1負。
上季先加入澳職嘅墨爾本雄心，首季表現唔錯，僅因得失球唔及噴射機排第8。雖然佢哋季前有射手艾萊斯同史高高兩大老將宣布退役，但就喺美職華盛頓聯隊簽得巴西好波之人費列特同澳洲超新星大衞威廉斯，今場絕對有機搶分，畢竟雄心上季聯賽攞到嘅35分入面，有17分喺客場取得，不容忽視！
