拜仁日前終於喺德甲取得新季首場主場勝利，成功秘密可能係班WAG！原來呢班靚太團當日入場坐埋一齊打氣，難怪洛賓賽後意氣風發，話只係用咗7成功力，暗示今晚歐聯會「打真軍」開殺戒啦！
洛賓寸嘴：用咗7成力咋
揭幕戰主場以0:1不敵慕遜加柏嘅拜仁，日前重返安聯球場出戰，結果以5:0大勝漢堡，據講拜仁一眾球員喺入波後，都冇好似平時咁走去南看台同球迷慶祝，反而去晒主看台嘅105同106區。原來當日拜仁一眾戰將嘅WAG都坐晒喺呢區打氣，當中包括洛賓老婆Eillert同一對囝囡、舒韋恩史迪加女友莎拉、馬里奧高美斯「打令」西爾維婭同紐亞Honey凱瑟林等，難怪當日拜仁班友仔入波後特別興奮，不停向看台飛吻同揮手啦！
其中射入一球靚波嘅「小飛俠」洛賓，可能因為心情勁靚，佢日前受訪嗰陣，話嗰場波根本未出盡全力：「嗰日我表現OK嘅，發揮到大約71%啦！」究竟用埋嗰29%會有幾勁？大家今晚就真係要拭目以待啦！
