今日另一場女子世界盃A組分組賽,加拿大女足對法國女足。若論世界排名及往績,加拿大稍為優勝,但法國近年不斷進步,實力早已拍得住一線強隊,今場冇開讓球盤,進取啲捧法國女足客W!(有線64台周五凌晨零時直播)
加拿大有勇無謀未夠班
今場波馬會開盤嘅時候,係加拿大熱啲,但依家已變番法國係熱門,由2.55倍跌至2.35倍,不過「讓球主客和」暫時仲係加拿大讓波,大家投注前要留意盤口。
加拿大首仗對衞冕兼主辦國德國,都係僅輸一球,可能好多人會覺得呢隊波有啲料到,但有睇直播嘅朋友,都知道兩隊波根本冇得打,若非德國放軟手腳,換走主將佩蓮絲,又或者好運一啲,德國早已大勝,而加拿大嘅整體表現亦令人失望,畀人有勇無謀嘅感覺。
反觀法國首仗雖僅以一比○小勝尼日利亞,但演出惹人好感,除咗有隊形,亦有耐性組織攻勢,其實法國女子足球近年進步神速,好似當地班霸里昂,今年就力壓德國勁旅圖爾賓奪得女子歐聯冠軍,食住個勢相信國家隊亦有運行,今場一於捧法國女足W!