今晚英超10點場一隊名牌都冇,唔想睇住護級球隊垂死掙扎,倒不如揀西布朗對阿士東維拉呢場中部打吡,論技術層面,當然冇得同西班牙國家打吡相提並論,但睇頭亦肯定十足。
維拉等放暑假
西布朗愈來愈有愛華頓嗰種上下一心嘅味道,當銳嗰陣就算踢風流波都咁醒神,自從鶴臣接手後,成績唔止穩步上揚,一眾有條件搵個更好碼頭嘅球員,好似射手奧丹維治都表態留隊,前景相當光明。
反觀作客嘅維拉就有好多唔明朗因素,先係未知成日出入醫院嘅領隊侯利亞仲教唔教到波,美國老闆仲肯唔肯投資又未知,希斯基同皮利斯又聽清洗,攞夠分護級後好有等放假feel,受讓平半都咪制。(有線204及304周六晚10:00直播)
Battle精選
足球重心 西布朗(上盤)
睇飛搵食 拿玻里(和)
雖則話拿玻里數字上仲有機會爭標,但查實機會唔大,前三亦相當穩陣,難怪近期演出走樣,今仗迎戰有3名球員停賽嘅熱拿亞,足智彩主W竟有1.33倍,仲冷過歐平,意甲季尾特別多和波,不如直取4.25倍和。