本周葡超上演馬德拉島打吡戰，由馬里迪莫主場對國民隊。其實去到季尾好多葡超球隊都「自我抖暑」，競爭力明顯回落。不過凡事總有例外，就好似今場主角之一馬里迪莫，近期仲有兩腳畀球迷睇吓，連續三場聯賽全勝兼取得十個入球，球員狀態弗到爆燈，應可於打吡戰中取勝，主Ｗ值得留意。（周六凌晨3時15分開賽）
馬里迪莫近三場全勝都係大比數，而最近一次主場對住奧漢倫斯就大勝對手四比○，難得喺季尾谷起狀態，馬里迪莫當然想保持強勢完成今季聯賽。加上佢哋仍有機會爭上積分榜頭五位，今場梗係會拚盡求三分。國民隊上輪擊敗費利拿確值得一讚，不過佢哋作客表現較差，近兩次作客面對榜下游球隊如塞圖巴爾及樸迪莫倫斯都失分而回，今次要贏同級對手馬里迪莫就有一定難度。根據近年對賽往績，馬德拉島打吡戰都幾利馬里迪莫，主W有2倍不妨捧場。
德乙捧「雙奧」齊贏
另外德乙方面，奧格斯堡主場對格雷特霍夫，主W開出機會高。今季德乙爭標形勢極之緊湊，奧格斯堡只落後榜首哈化柏林兩分，為咗冠軍奧格斯堡未來日子一定會去盡，格隊要作客捱唔得幾耐。最後護級球隊奧斯納貝克主場對比勒費爾德，同樣揀選主W。話就話護級大戰，查實比勒費爾德與尾二奧柏侯遜都差成十分咁多，球員早就放棄爭逐。奧斯納貝克可憑主場之利痛擊對手，主W穩開。
